ரஷ்யாவில் எரிநட்சத்திரம்
அன்று..அதிகாலையிலேயே(15/02/13) ரஷ்யாவில் எரிநட்சத்திரம் ஒன்று எரிதனலாக வீழந்து வெடித்ததில், 500க்கு மேற் பட்டோர் காயமடைந்தனர். நேற்று இரவு, பூமிக்கு மிக அருகில் வந்து சென்ற மிகப்பெரிய விண்கல்லாக மற்றுமொரு சிறுகோள் சாதனை படைத்தது.
இவ்விரண்டு விடயங்களையும் பற்றி உலகம் பேசி கொண்டிருக்க நேற்றைய தினம் ஆஸ்திரேலியா ஒரு அறிவிப்பு வெளியிட்டது. அதாவது பூமியில் சுமார் 300 மில்லியன் வருடங்களுக்கு முன்னர் மோதிய மிகப் பெரிய விண்கல் ஒன்றினால் ஏற்பட்ட மாபெரும் குழியை தாம் சமீபத்திய ஆய்வுகள் மூலம் கண்டு பிடித்திருப்பதாக அவுஸ்திரேலிய தேசியப் பல்கலைக் கழகம் அறிவித்துள்ளது. தெற்கு அவுஸ்திரேலியாவின் வடகிழக்கே அமைந்துள்ள வார்பூர்டொன் பாசின் எனும் இந்தக் குழி 30 000 சதுர கிலோமீட்டர் பரப்பளவுடையது. இக்குழி ஏறக்குறைய 298 மில்லியன் வருடங்களுக்கும் முன்னர் பூமியுடன் மோதிய 10 தொடக்கம் 20 கிலோமீட்டர் வரையிலான விட்டம் உடைய விண் கல்லால் தான் ஏற்பட்டிருக்கும் எனக் கணிக்கப் பட்டுள்ளது. இது குறித்து ANU பல்கலைக் கழகத்தைச் சேர்ந்த டாக்டர் அன்ட்ரூ க்ளிக்சன் என்பவர் கூறுகையில், அதிகபட்ச விட்டம் 200 Km ஐ விட அதிகம் உடைய இக்குழி பூமியில் மோதிய மிகப்பெரிய விண்கற்களால் ஏற்பட்ட குழிகளின் வரலாற்றில் 3 ஆவது இடத்தைப் பிடித்துள்ளது என்றுள்ளார்.
இதேவேளை இந்த விண்கல்லின் மோதல் 360 மில்லியன் வருடங்களுக்கு முன்னர் பூமியில் முதல் உயிரினங்கள் தோற்றம் பெற்ற காலமான டெவோனியன் யுகத்தின் (Devonian period) இறுதியில் நிகழ்ந்திருக்கலாம் எனவும் கருதப்படுகின்றது. இக்காலத்தில் பூமியில் மிகப்பெரிய உயிர் அழிவு (Extinction) ஏற்பட்டது என்பதும் குறிப்பிடத்தக்கது. டாக்டர். க்ளிக்சன் மேலும் கூறுகையில், நேற்று வெள்ளிக்கிழமை பிற்பகல் பூமியில் இருந்து 34 000 Km தொலைவில் அதை நெருங்கி வந்து சென்ற 2012DA14 எனப்படும் விண்கல் மிகக்குறைந்த பட்ச வீதத்தில் தகவல் தொடர்பு செய்மதிகளுடன் மோதும் வாய்ப்பு இருந்தது. மற்றும் படி பூமுயுடன் மோதாது என்பது திட்டவட்டமாக தெரிந்தது தான். எனினும் ஒரு கணிப்புக்காக இந்த விண்கல் பூமியில் மோதினால் 1 Km விட்டமுள்ள குழி ஏற்படும் எனவும் அவர் தெரிவித்திருந்தார்.
நன்றி: Keyem Dharmalingam.

No comments:
Post a Comment